ҚР Есеп комитетінің делегациясы Бельгия аудит сотының тәжірибесімен танысты Республикалық бюджеттің атқарылуын бақылау жөніндегі есеп комитетінің қызметкерлері тәжірибе алмасу мақсатында Брюссель қаласындағы Бельгия Корольдігінің аудит сотына барды. Сапар барысында делегация Бельгияның жоғары аудит органының негізгі қызмет бағыттарымен және құқықтық базасымен танысты. Бельгия аудит сотының өкілдері тиімділік аудитін жүргізу тәжірибесімен бөлісті. Бұдан басқа, тараптар мемлекеттік аудиторларды кадрлық іріктеу жүйесі, Парламентке есеп беру, ұсынымдардың орындалуын бақылау және мемлекеттік аудиттің басқа да өзекті мәселелерін талқылады. Іс-шара аясында Бельгия аудит сотының аға президенті Филипп Роланд мырзамен кездесу өтті, ол екіжақты форматта да, халықаралық аудиторлық ұйымдар – ИНТОСАИ мен ЕВРОСАИ желісі бойынша да табысты дамып келе жатқан ынтымақтастық үшін алғысын білдірді. Зерделенген тәжірибе нәтижелері бойынша Есеп комитеті Қазақстан Республикасының Жоғары аудиторлық палатасына қайта құру шеңберінде нормативтік құқықтық актілерді әзірлеу кезінде Бельгия аудит сотының озық тәжірибесінің кейбір аспектілерін қолдануды жоспарлап отыр. * Бельгия Корольдігінің аудит соты (бұдан әрі – Аудит соты) Бельгиядағы әкімшілік юрисдикция болып табылады, ол Бельгия Корольдігі Конституциясының 180-бабында Бельгия Федералдық Парламентінің көмекші органы ретінде белгіленген және федералды мемлекеттің, қауымдастықтардың, өңірлердің, қоғамдық мүдделер органдарының және провинциялардың бюджеттік, бухгалтерлік және қаржылық операцияларына сыртқы бақылауды жүзеге асырады.

Добавить комментарий